Florim Nezirajt iu prishën pushimet ende pa i nisur mirë, kur më 6 korrik Policia e Turqisë e arrestoi atë në Antalia nën dyshimin se ka abuzuar seksualisht me një të mitur. Insajder ka siguruar dokumente të Zyrës së Kryeprokurorit të Antalias, që dëshmojnë për dyshimet e ngritura ndaj kryeimamit të Kaçanikut nga autoritetet turke.

Në korrikun e këtij viti kryeimami i Kaçanikut, Florim Neziraj, udhëtoi me vëllezërit e tij për pushime në Antalia të Turqisë; njërën nga qytetet më të vizituara turke gjatë sezonit të verës.

Por, pushimet e Nezirajt u prishën ende pa përfunduar, kur më 6 korrik Policia e Turqisë arrestoi atë, nën dyshimin se abuzoi seksualisht me një të mitur. Dyshimet i ngriti Zyra e Kryeprokurorisë së Antalias e cila në bashkëpunim me Policinë e Turqisë e mbajti për katër ditë në paraburgim Nezirajn.

Insajder ka siguruar një dokument të Zyrës së Kryeprokurorit të Antalias, të përpiluar më 9 korrik, në të cilën janë ngritur dyshimet se Florim Neziraj abuzoi seksualisht me një të mitur në Antalia. Dokumenti i është dërguar edhe autoriteteve kosovare në Turqi, në bazë të detyrimeve dhe përgjegjësive ligjore.

“Florim Neziraj, shtetas i Kosovës, i arrestuar më 06.07.2018 u mor në pyetje nga Zyra e Kryeprokurorit të Antalias”, thuhej në shkresën e Kryeprokurorit të Antalias, Serik Culh, të cilën e ka siguruar Gazeta Insajder.

Po ashtu, në formularin e mbushur nga Zyra e Kryeprokurorit të Antalias theksohet se Florim Neziraj dyshohet për një vepër penale: “Abuzim seksual me një të mitur”.

“Akti që pretendohet se ka kryer i dyshuari: Abuzim seksual me fëmijë”, thuhet në dokumentin e Zyrës së Kryeprokurorit të Antalias, teksa bëhet e ditur se kryeimami i Kaçanikut u arrestua në qytezën bregdetare të Kepezit – pjesë e Bashkisë së Antalias.

Insajderi ka tentuar të marrë një përgjigje nga kryeimami i Kaçanikut, por të afërm të tij kanë thënë në telefon se Florim Neziraj ndodhet momentalisht jashtë vendit. Gazeta i ka dërguar edhe pyetje Nezirajt, por sërish nuk ka pranuar të përgjigjet.

Në një intervistë për mediat para dy javësh, Neziraj mohoi të jetë arrestuar në Turqi. “Nuk është e vërtetë”, tha Neziraj të shtunën e kaluar.

Po ashtu, Insajderi ka tentuar të marrë një përgjigje edhe nga Ambasada e Kosovës në Turqi, lidhur me rastin, por nuk ka marrë ende përgjigje nga asnjëra prej institucioneve në fjalë.

Ndërkaq, pesë ditë më parë, Gazeta Express ka raportuar se në Policinë e Kosovës është denoncuar dyshimi për abuzim seksual nga një imam në Podujevë. Një familje në fshatin Sibovc të Podujevës e ka denoncuar hoxhën Beqir Nuredini nën dyshimin se ka dhunuar seksualisht vajzën e tyre V.I., 16-vjeçare.

Shteti në dijeni për arrestimin dhe dyshimet e ngritura ndaj Nezirajt

Republika e Kosovës është njoftuar direkt nga autoritetet turke pas arrestimit të Florim Nezirajt të premten e 6 korrikut në qytezën Kepez të Turqisë. Madje, siç tregojnë dokumentet e siguruara nga Insajderi, Zyra e Kryeprokurorit të Antalias njoftoi autoritetet kosovare në Turqi për arrestimin e kryeimamit të Kaçanikut.

Po ashtu, për rastin ka folur të shtunën e kaluar edhe ministri i Punëve të Jashtme të Kosovës, Behgjet Pacolli, i cili ka thënë se është në dijeni të rastit, por nuk ka dhënë shumë detaje.

“Po rasti është i njohur për ne, qytetari i Kosovës Florim Neziraj nga Komuna e Kaçanikut. Florimi ka qenë në paraburgim për 4 ditë në Antalia, pastaj është liruar dhe i janë kthyer te gjitha dokumentet. Ne jemi në kontakt me zotin Neziraj”, deklaroi Pacolli të shtunën e 21 korrikut, në një prononcim për Kallxo.com.

Ndërkaq, Policia e Kosovës ka vlerësuar se arrestimi i kryeimamit të Kaçanikut në Turqi është çështje konsullore, por është shprehur se është në dijeni për rastin.

“Ne për të gjitha rastet që janë kompetencë e Policisë së Kosovës, natyrisht që jemi përgjigjur dhe do të përgjigjemi gjithnjë, por çështja për të cilin na keni shkruajtur neve, është çeshtje Konsullore, prandaj referojuni autoriteteve përkatëse për të marrë një përgjigje të mundshme atje”, thuhet në përgjigjen e Zyrës për Informim të Policisë.