Zv/ministri i Mbrojtjes, Petro Koçi u është përgjigjur edhe akuzave të ish-kryeministrit Sali Berisha, i cili ka deklaruar se është informuar që numri i viktimave që kanë ndërruar jetë për shkak të të koronavirusit në Shqipëri është më i lartë dhe fshihet nga qeveria.
Koçi akuzoi ish-kryeministrin se kërkon kaos e panik nga që qeveria dhe instancat shtetërore po e përballojnë me sukses betejën me koronavirusin, ndërsa deklaroi se Berisha për inat të kryeministrit Rama ka “lajthitur”, duke bërë aleancë me Covid-19.
“Sali Berisha është i shqetësuar për numrin e ulët të viktimave dhe rënien e kurbës së infektimit në popullatë. Kjo nuk i shkon për shtat interesave të tij politike. Prandaj kërkon ta balancojë me nxitje paniku dhe kaosi. Paniku dhe kaosi ndihmojnë përhapjen e virusit. Për inat të Edi Ramës, Saliu ka zgjedhur aleancën me virusin Korona”, deklaroi ai.
Më tej, zv/ministri i Mbrojtjes, Petro Koçi u shpreh se ish-kryeministri Sali Berisha është në vetvete një virus politik nga i cili po vuan akoma Shqipëria, ndërsa theksoi se dhuna dhe agresiviteti janë disa nga simptoma që Berisha ka shfaqur brenda Partisë Demokratike.
“Saliu vetë është një virus politik nga i cili Shqipëria vuan akoma. Trupi i sëmurë i Partisë Demokratike që nuk ka fuqi ta mposhtë këtë lloj virusi që fatkeqësisht ka mbërthyer edhe kryedemokratin Lulzim Basha. Dhuna, agresiviteti, radikalizmi, anti-institucionalizimi, urrejtja dhe privatizimi i shtetit janë simptomat që shfaq virusi Sali në PD”, nënvizoi zv/ministri i Mbrojtjes, Petro Koçi për gazetën “SOT”.
Më herët, kryeministri Rama duke iu përgjigjur akuzave të Berishës në një prononcimi për mediat, është shprehur se ai është në kërkim të viktimave çdo ditë.
“Mendoj që nëse thuhen gjëra të tilla, me ose pa dashje nxirret në mexhelis një dëshirë që mund të jetë edhe e pavetëdijshme në një kohë që unë di shumë mirë që lideri legjendar i PD është në kërkim të kufomave. Lideri legjendar i PD është në kërkim të viktimave çdo ditë.
Është një haluçilacione që të vdekur nga koronavirusi nuk raportohen. Patjetër ka dijeni drejtpërdrejt nga Shefi imagjinar i shërbimeve Funerale. Se s’ka të vdekur të tjerë nga Epidemia që i ka shpëtuar syrit të mediave dhe dynjasë dhe u fshehkan me kaq sukses nga qeveria. Kjo janë gjëra të turpshme dhe të fajshme. duhet të bëjmë çmos të jemi pranë njerëzve. Por kjo është thjeshtë të jesh pranë karriges dhe imagjinatës që vazhdon e ushqehet me dokrra”, deklaroi kryeministri Edi Rama.
