Shoqata e Neonatologeve në Kosovë ka njoftuar se është konfirmuar rasti i parë me COVID-19 te të porsalindurit, i cili është edhe rasti i parë tek foshnjat në Kosovë. Kjo u bë e ditur nga Burbuqe Skënderi, kryetare e kësaj shoqate, përmes një shkrimi në “Facebook”. Ajo ka thënë se gjendja e përgjithshme e foshnjës është stabile. “Shoqata e Neonatologeve të Kosovës raporton rastin e parë te të porsalindurit me Covid pozitiv, gjendja e përgjithshme e foshnjës momentalisht stabile. Beni kujdes, Covid nuk zgjedh moshë!”, ka shkruar Skenderi.
Ndërkaq, brenda 24 orëve të fundit, në Kosovë janë shënuar edhe katër viktima nga koronavirusi i ri. Instituti Kombëtar i Shëndetësisë Publike ka njoftuar të mërkurën se numri i përgjithshëm i viktimave ka arritur në 86. Sipas njoftimit, të mërkurën, nga 413 testime të kryera, janë regjistruar edhe 214 raste me coronavirusin e ri, duke e çuar numrin e përgjithshëm të të infektuarve në 4.100. Ndërkaq, nga 1 korriku me vendim të Qeverisë së Republikës së Kosovës ka filluar aplikimi i një cikli të ri të masave parandaluese ndaj përhapjes së COVID-19 në vendin tonë!
