Trajneri i Juventusit, Maurizio Sarri, beson se Atalanta është njëra prej skuadrave më në formë në Evropë tani për tani dhe thotë se skuadra e tij ia doli ta nxjerrë një barazim 2:2 ndaj saj vetëm pasi e ndryshoi qasjen e lojës në pjesën e dytë. Bardhezinjtë u mbizotëruan plotësisht në pjesën e parë dhe e gjetën veten në disavantazh dy herë të shtunën në Torino, por e arritën një barazim 2:2 falë dy penalltive të shënuara nga Cristiano Ronaldo, transmeton Gazeta Express.
Ky rezultat ia mundësoi Juventusit ta ngrejë në nëntë pikë epërsinë në krye të Serie A, pasi Lazio u mund 2:1 nga Sassuolo më herët gjatë ditës. “Ne u përballëm me njërën prej skuadrave më në formë në Evropë”, tha Sarri pas ndeshjes.
“Ajo është skuadër agresive dhe e organizuar shumë mirë. Në fillim ne gabuam që pritëm të na vinte topi në këmbë, sepse ata i shfrytëzojnë këto situata dhe kështu i pranuam golat, duke e humbur topin”, shtoi ai. “Të luash kundër Atalantas është shumë e vështirë. Ajo ishte shumë më e mprehtë se ne në pjesën e parë, por ne ia dolëm të ktheheshim në lojë në pjesën e dytë dhe fatmirësisht ta barazonim rezultatin. Ne ishim më energjikë, u mbrojtëm më larg portës dhe nuk ishim shumë pasivë. Kjo na e mundësoi ta fitonim topin më shpesh në mesfushë dhe kjo e ndryshoi ndeshjen”, theksoi ai.
