Velipoja është plazhi më verior i Shqipërisë me bukurinë dhe kontrastet e forta që e karakterizojnë.
Deti i Velipojës, me ujin e tij të pastër e të kthjellët, ndërthuret me gjelbërimin e pishave që pushtojnë bregdetin. Në Velipojë gjendet një ndër plazhet ranore me shtrirjen më të gjerë në Shqipëri dhe është pikërisht rëra me efektin e saj kurativ ku ndërthuret me hijeshi deti, ranishtja, lumi, delta me ishuj, kodra, pylli, laguna e fusha, që ka bërë për vetë çdo vit pushues të shumtë.
Ornela Çuçi, zv/Ministër i Turizmit dhe Mjedisit, duke publikuar foto nga bregdeti i Velipojës ka vënë në dukje vetitë kurative të këtij plazhi.
“Në mbi 14 kilometër plazh në Velipojë, ajo që të tërheq vëmendjen, është rëra e “zezë”, që në të vërtetë është një rërë ngjyrë bojëkafe e mbyllur. Arsyen e kësaj ngjyre, që ka lidhje me përqendrimin e pazakontë të jodit, është se pjesa më e madhe e buzëdetit të Velipojës, ishte para viteve ’90, një zonë e egër dhe që ruhej si një zonë ushtarake çka ka bërë të ruajë natyralitetin e saj”,- thekson Çuçi.
“Jodi i përqendruar i rërës së “zezë”, shëron të gjitha llojet e sëmundjeve tiroidale, që lidhen me mungesën e jodit në trup. Buzëdeti i Velipojës, e krijon këtë mundësi, në mënyrë të mrekullueshme”,- shton Çuçi
