Ajo sot mbush 100-vjeçe, por jeton ende me Tiranën, dhe përjeton emocionet e futbollit. I përket familjes Stermasi, ose si të thuash ndryshe është pjesë e emblemës, aty ku nis historia e vërtetë e Tiranës. Bashkëshortja e Selman Stërmasit, legjenda e Tiranës dhe e futollit shqiptar, sot në përvjetorin e saj të veçantë, mori urimë të shumta nga miq, të afërm, dhe dashamirës të futbollit. Ajo edhe pse mbi supe mban plot një shekull, gëzon shëndet të plotë dhe jeton me simbolet e Tiranës, si dhe me emocionet e këtij ekipi.
Nezihat STERMASI (Petrela) mbushi sot plot 100 vjeç. Mes mesazheve të shumta, edhe kreu i FSHF-së, Armand Duka, i dedikoi një urim: “E nderuara zonja Nezihat!” “Ju uroj për ditëlindjen tuaj të 100-të. Në këtë çast të gëzueshëm, më lejoni të vlerësoj pasionin që ju, bashkëshorti juaj Selmani dhe familja Stërmasi, keni treguar gjatë gjithë jetës tuaj shekullore, për futbollin”. “Ditët në vazhdim, qofshin sa më të lumtura për Ju dhe të afërmit tuaj. Edhe njëherë, gëzuar ditëlindjen!” – shkroi Duka në mesazhin e tij.
Stadiumi i dytë i Tiranës mban emrin “Selman Stërmasi”, njeriut që ngriti themelet e skuadrës bardheblu të kryeqytetit, ekip që sot numëron më shumë trofe se çdo ekip tjetër në Shqipëri.
