Selaniku, Larisa dhe Rodhopin do të hyjnë në karantinë pas rasteve të shtuara me Covid-19. Burime për Top Channel bëjnë me dije se nga nesër kryeministri grek Mitsotakis do të shpallë masat e reja për të shmangur një mbyllje të dytë të përgjithshme të Greqisë.
Vetëm në 24 orët e fundit Organizmi Kombëtar i Shëndetit bëri me dije se u regjistruan 1547 raste të reja me koronavirus. Prej tyre 52 janë regjistruar në pikat kufitare të hyrjes së vendit, portet, aeroportet dhe kufijtë tokësore. Kështu numri i përgjithshëm i rasteve ka shkuar në 34299 vete, mosha mesatare e të cilëve është 38 vjeç.
Gjithashtu 108 persona vazhdojnë të trajtohen në terapi intensive, prej të cilëve 93.5% kanë historik të rënduar shëndetësor dhe janë mbi 70 vjeç. Numri total i vdekjeve nga virusi ka shkuar në 603, me moshë mesatare 79 vjeç. Specialistët e shëndetësisë shohin me shqetësim shpërthimin e rasteve në Greqinë e veriut.
