Anglia do të kthehet në një version më të ashpër të tre niveleve rajonale të kufizimeve të koronavirusit kur bllokimi kombëtar të përfundojë në 2 dhjetor, pritet t’u thotë sot deputetëve kryeministri i Britanisë së Madhe Boris Johnson. Kryeministri do të tregojë gjithashtu masat se si qytetarët mund t’i shohin të dashurit e tyre gjatë Krishtlindjeve në një deklaratë në parlament të hënën, tha një zëdhënës i Downing Street – duke lënë të kuptohet se ministrat do të nënshkruajnë një amnisti të përkohshme nga masat më të ashpra Covid. Diskutimet janë duke vazhduar por plani për t’i dhënë fund bllokimit kombëtar njëmujor në kohë do të diskutohet në një takim të kabinetit të dielën përpara se Z. Johnson të kërkojë nga deputetët që të votojnë mbi propozimet.
Downing Street tha se vendi do të kthehet në sistemin me tre nivele siç ishte para bllokimit kombëtar, por shtoi se masat do të forcohen, me më shumë zona që do të vendosen në nivelet më të larta. Shkencëtarët qeveritarë kritikuan efektivitetin e sistemit të niveleve përpara bllokimit të dytë kombëtar, duke këmbëngulur që niveli më i ulët, i cili lejonte mbledhjet e gjashtë njerëzve nga familje të ndryshme, kishte “pak efekt” në uljen e përhapjes së epidemisë.
Njëherazi me deklaratën e Z. Johnson, Grupi Këshillimor Shkencor për Emergjencat (Sage) pritet të publikojë dokumente duke përsëritur këshillat e tij të mëparshme se kërkohet një qasje më e ashpër rajonale nëse virusi duhet të mbahet larg. Kjo sugjeron që masat e rrepta ka të ngjarë të qëndrojnë në fuqi të paktën deri në periudhën festive. Ministrat janë në diskutime me administratat për një qasje të gjerë në Mbretërinë e Bashkuar për Krishtlindje. Sidoqoftë, Kryeministri gjithashtu përballet me mundësinë e një revolte mbi sistemin e nivelit të masave të Anglisë.
