Mjeku shqiptar që shërben në SHBA, Gentian Toshkëzi, tha në një lidhje me “Skype” për News24 se situata me koronavirusin në Amerikë është e rënduar dhe shifrat po rriten nga dita në ditë. Mjeku Toshkëzi theksoi se shifrat e infektimeve dhe viktimave nga Covid-19 në SHBA janë të njëjtë me ato të para muajit maj, kur u shënua piku i valës së parë.
“Situata në SHBA ka qenë vërtet e rënduar ditët e fundit. Ka pasur rritje të pacientëve me Covid. Numri është rritur përditë. Gjendja është e rënduar me këtë fluks të madh pacientësh. Po shohim numrat që janë të njëjtë me ato të para muajit maj. Mendoj se kemi futur protokollet për të mos shkuar drejt kolapsit. Ky virus erdhi me shumë të panjohura. Duke e njohur virusin ne filluam në mënyrë urgjente të implementonim protokollet për të trajtuar virusin dhe tani e kemi më të qartë. Tani kemi protokolle që në një far mënyrë supertojnë problemet, por kemi dhe një ilaç, që prodhohet në mënyrë të përshpejtuar si remdesiviri, por edhe plazma, që ndihmojnë pacientët të dalin nga gjendja e rënduar. Për pacientë më të rënduar kemi protokolle më agresive për trajtimin e tyre”, tha mjeku shqiptar.
Neurokirurgu shqiptar foli dhe për ndikimin e koronavirusit te sistemi nervor i pacientëve, duke thënë se është e vërtetë që ky virus prek sistemin nervor dhe trurin e të infektuarve.
“Kemi vënë re që ky sistem prek edhe sistemin nervor, edhe trurin. Disa nga simptomat e prekjes së sistemit nervor lidhen direkt me infektimin e virusit në qelizat nervore. Simptomat mund të jenë të ndryshme, fillon që nga simptoma të lidhura me inskeni, si mundja e vetëdijes, probleme me të folurit, paraliza të gjymtyrëve, etj. Shoh pacientë me Covid që paraqesin probleme edhe me delirin dhe psikoza, që janë vënë re edhe te pacientë me simptoma më të lehta të Covidit. Pacientët që kanë këto probleme i kemi trajtuar në varësi të simptomave që kanë shfaqur. Në varësi të pacientit dhe simptomave që paraqesin, kemi përshtatur edhe trajtimin e tyre”, u shpreh ai.
