Në vendet e mëdha në mbarë botën ka nisur vaksinimi i popullatës për Covid-19 dhe tashmë ky hap merr një tjetër nivel. Nga Italia mësohet se po diskutohet vaksinimi i të gjithë futbollistëve dhe pjesëtarëve të stafit.
Këtë lajm e konfirmon anëtari i Komisionit Mjekësor në Federatën Italiane, Francesco Braconaro. Ai shprehet se futbollistët dhe stafet duhet të vaksinohen dhe argumenton se duhet të jetë e detyrueshme. Braconaro shprehet se kjo çështje nuk është adresuar ende në Komision.
“Vaksinimi i të gjithë futbollistëve profesionistë është hipotezë, që duhet vlerësuar. Meqenëse ky është problem i shëndetit publik në përgjithësi dhe të jesh një komunitet i vogël në futboll, vaksinimi i disa apo dhe të gjithëve bëhet i dobishëm.
Unë do ta bëja vaksinën të detyrueshme, duke parë se çfarë kemi kaluar në këto dhjetë muaj. Çështja e vaksinave nuk është adresuar ende në Komision, por mendoj se mund të jetë gjë e mirë të vaksinohen të gjithë futbollistët profesionistë”, u shpreh Braconaro.
