Kryetari i Bashkisë së Tiranës Erion Veliaj ka bërë një urim të veçantë për 29 vjetorin e FRESSH. Përmes një postimi në rrjetet sociale ai thotë se sot nuk mund të festohet për shkak të situatës me pandeminë, por u kërkon të rinjve të FRESSH, që këto 100 ditë para zgjedhjeve të bëjnë një sprint për Shqipërinë e mirë.
“Gëzuar ditëlindjen @FRESSHAL. Së shpejti do festojmë sërish, por si fillim – sprint 100 ditë për fitoren në 25 Prill, për Shqipërinë e mirë që vetëm e majta progresiste mund ta rindërtojë pas tërmetit e ta rimëkëmbe pas pandemisë!”, shkruan ai në Twitter.
Të rinjtë luajnë një rol të veçantë në vendin tonë, ndërsa kujtojmë se Tirana është shpallur “Kryeqyteti Europian i Rinisë” për vitin 2022 dhe pret që vitin tjetër i gjithë vendi të mbushet me të rinj nga e gjithë bota. Tirana do të ketë një program ambicioz që do të synojë të adresojë nevojat e të gjithë të rinjve të saj dhe jo vetëm si dhe do të lidhë qytetin dhe rininë e tij me vlerat evropiane.
