Debati nëse realiteti ku jetojmë dhe gjithçka rreth tij është një simulim kompjuterik, ka nisur prej hipotezës së filozofit suedez Nick Bostrom që u reflektua më pas në filmat e famshëm të serisë “The Matrix”, ku njerëzimi tregohej i bllokuar brenda një realiteti të simuluar.

Tashmë idesë po i jep jehonë dhe kreu i kompanive të teknologjisë SpaceX e Tesla, Elon Musk i cili thotë se idea nuk ka asgjë qesharake dhe duhet të merret seriozisht. Së fundmi është ripublikuar një fjalim i Musk në 2016 në përgjigje të pyetjes nëse njerëzimi po jeton vërtet në një ekzistencë të tipit “Matrix”.

Sipërmarrësi thotë se shanset që gjithcka rreth nesh të jetë e vërtetë, janë “një në 1 miliardë”.

“Argumenti më i fortë për faktin që po jetojmë në një simulim, është sepse thjesht 40 vjet më parë ne kishin vetem një ekran me dy katrorë e një pikë, që quheshin lojra elektronike. Ndërsa sot 40 vjet më vonë kemi simulime foto-realiste 3-dimensionale, me miliona njerëz që mund të luajnë njëherësh dhe realiteti virtual apo realiteti i përforcuar, po përmirësohet nga viti në vit”, tha Musk.

Inovatori i teknologjisë thotë se me ritmet aktuale të avancimeve teknologjike, në të ardhmen video-lojrat nuk do të kenë asnjë ndryshim nga realiteti i vërtetë, duke sugjeruar se njerëzit do të mund të krijojnë realitetet e tyre personale.

“Ne ose do të krijojmë simulime që janë të padallueshme nga realiteti, ose civilizimi do të pushojë së ekzistuari”, tha mes të tjerash Musk.

Gjithashtu edhe Nick Bostrom, i cili shkruante në dokument se jeta që ne njohim, madje edhe ne vetë, mund të jemi një simulim kompjuterik, besonte se ka 20 përqind shanse që kjo të jetë e vërtetë.