Kompania anglo-suedeze AstraZeneca dhe Universiteti i Oksfordit filluan testimin e një vaksine të modifikuar të koronavirusit, të krijuar për të vepruar kundër variantit Beta.
Ky variant është identifikuar për herë të parë në Afrikën e Jugut, por më pas është përhapur në disa vende të botës. Mbi 2,000 vullnetarë u rekrutuan në Mbretërinë e Bashkuar, Brazil, Afrikë të Jugut dhe Poloni për testimin e vaksinës së modifikuar.
Profesori Andrew Pollard, drejtor i Grupit të Vaksinave të Oksfordit, i tha BBC-së se synim është “të testohet sistemi” i bërjes së vaksinave kundër varianteve. Ai tha se nuk ka “asnjë urgjencë të menjëhershme” rreth variantit Delta, pasi vaksina AstraZeneca është treguar si mjaft efektive kundër tij.
Javën e kaluar, Universiteti i Oksfordit ka publikuar një studim, i cili ka gjetur se vaksinat AstraZeneca dhe Pfizer/BioNTech janë gjerësisht efektive kundër variantit Delta, i identifikuar për herë të parë në Indi. Ky variant është përhapur në rreth 100 vende të botës dhe është duke shkaktuar shpërthime rastesh gjetkë.
Studimi i Oksfordit ka konstatuar se vaksinat AstraZeneca dhe Pfizer/BioNTech janë efektive edhe kundër variantit Kapa, i identifikuar së pari në Indi. Kapa, tash për tash, është vetëm variant i interesit, për dallim nga variantet Alfa, Beta, Gama dhe Delta, të cilat Organizata Botërore e Shëndetësisë i ka veçuar si variante shqetësuese. Sipas OBSH-së, një variant etiketohet si shqetësues kur duket se është më ngjitës, më vdekjeprurës ose më rezistent ndaj vaksinave ose trajtimeve aktuale.
