Komuniteti afgan i vendosur në Shëngjin prej dy muajsh, tashmë po mundohet të përshtatet me kushtet dhe jetesën aty. Të larguar nga vendi i tyre, ata kanë lënë pas gjithçka, përfshirë familjen, punën, shtëpinë e pasurinë, e ndërsa gjenden në një vend krejtësisht të panjohur, ata mundohen të përshtaten me gjuhën e zakonet, jo shumë të ndryshme nga tonat. Në intervistat e realizuara për Klan News, shtetasit afganë tregojnë për peripecitë e tyre deri sa erdhën në vendin tonë, ndërsa shprehen të lumtur që edhe pse për pak kohë, do të jetojnë në një vend kaq të bukur e me njerëz mikpritës. “Kam qenë në Afganistan si shef i një prej mediave të mëdha atje. Unë së bashku me familjen time jetoja në Kabul, por fatkeqësisht kam ardhur këtu vetëm, ndërsa anëtarët e familjes sime kanë mbetur atje. Kisha dëgjuar me parë për vendin tuaj dhe them me plot bindjen se këtu ka njerëz shumë të mirë. Unë ndihem mirë këtu, pasi dhe Shqipëria e ka provuar vetë emigracionin në të shkuarën edhe pse në një perspektive ndryshe.”
“Këtu është një vend i mrekullueshëm pasi ka shumë ditë me diell, po ashtu dhe ditë me shi, ndaj këtu jam shumë i lumtur me fëmijët dhe bashkëshorten time. Falenderoj qeverinë shqiptare që krijoi kushtet optimale për strehimin tonë këtu. Në Shqipëri në ndihem të lire, pasi mund të lëvizim lirshëm për pazaret e përditshme apo dhe në kafene ku të duam. Kisha dëgjuar më parë për Shqipërinë nga larg, por ja tani ndodhem këtu dhe më duket ndryshe. Njerëzit janë shumë të sjellshëm dhe miqësorë me ne. Kur isha ne Afganistan merresha me biznes, ndaj duke parë vendin tuaj aq të qetë dhe të bukur, po mendoj të krijoj një biznes këtu, pasi Shqipëria tashmë është si shtëpia e dytë për mua”.
Gjatë qëndrimit në Shëngjin, afganët kanë filluar të mësojnë edhe ndonjë fjalë në shqip Deri më tani rreth 1400 afgane janë vendosur në një resort në Shëngjin, dhe përveç stafit të hotelit që janë në dispozicion të tyre, po ashtu janë nën kujdesin e bluzave të bardha dhe forcave të policisë.
