Tottenhami i Antonio Contes tashmë e ka kaluar Manchester Unitedin në tabelën e Premierligës dhe është katër pikë prapa vendeve që dërgojnë në Champions League.
Tottenhami e mposhti Leedsin me rezultat 2:1 dje, duke i dhënë Contes fitoren e pare si trajner i “Spurs”, shkruan Gazeta Express.
Para pushimit ndërkombëtar, ai pati një barazim 0:0 ndaj Evertonit në ndeshjen e pare kampionale si trajner i Tottenhamit.
Conte arriti në Londrën Veriore pasi fillimisht ishte konsideruar për punën te Manchester Unitedi në fund të tetorit. Sidoqoftë, “Djajtë e Kuq” vendosën të qëndrojnë me Ole Gunnar Solskjaer, duke e humbur mundësinë ta marrin ish-trajnerin e Interit dhe Juventusit.
Tottenhami ishte dy pikë prapa Manchester Unitedit kur Conte erdhi në Londrën Veriore, teksa tani United ka 17 pikë, ndërsa Tottenham dy më shumë.
Trajneri italian e ka bërë top-4shen objektivin e tij këtë edicion.
“Ne kemi një ekip të ri me hapësirë të mjaftueshme për përmirësim. Nuk kemi shumë përvojë, por duhet ta kompensojmë me punë të palodhur dhe entuziazëm. Do të ishim të lumtur të fitonim një top-katërsh, kjo do të thotë të kapërcejmë një nga katër klubet më të mira”, tha Conte.
