Deri në këtë moment të sezonit, mund të thuhet se Bernardo Silva është një nga lojtarët më të mirë në botë. Portugezi konsiderohet një futbollist i kompletuar falë cilësive që ka. Me paraqitje të shkëlqyera në ndeshje të mëdha kundër Liverpool, Chelsea, Manchester United dhe Paris Saint-Germain, Bernardo Silva ka bindur një pjesë të tifozëve dhe të ekspertëve se është mes më të mirëve në botën e futbollit.
Ndërsa Pep Guardiola është mes atyre që e vlerësojnë shumë mesfushorin, ai ka shpjeguar pse ai beson se lojtari i City-t nuk ka asnjë shans për të fituar Topin e Artë në të ardhmen e afërt.
“Nuk ka për ta fituar kurrë Topin e Artë sepse duhet të jesh në rrjetet sociale dhe nuk mjafton të fitosh, por duhet të shënosh edhe shumë gola, gjë që Bernardo nuk e bën”, ka thënë trajneri spanjoll.
“Do të më pëlqente shumë nëse do të ndodhte një ditë. Do të isha i gëzuar për të si për çdo lojtar tjetër që kemi këtu nëse një ditë do të fitonte Topin e Artë. Për mua, si trajner, ai mund të bëjë gjithçka”.
