Një kolonë prej më shumë se 160 makinash u nis nga Mariupol të hënën, thanë zyrtarët lokalë, në atë që dukej të ishte përpjekja e parë e suksesshme për të organizuar një “korridor humanitar” për të evakuuar civilët nga qyteti i rrethuar ukrainas.
Civilët janë bllokuar në qytetin port të Detit të Zi për më shumë se dy javë dhe po mbarojnë furnizimet pasi u rrethuan nga forcat ruse, thonë autoritetet ukrainase. Pas disa ditësh përpjekjesh të dështuara për të dërguar furnizime në Mariupol dhe për të siguruar kalim të sigurt për civilët e bllokuar, këshilli i qytetit tha se një armëpushim lokal ishte duke u mbajtur dhe kolona ishte nisur për në qytetin e Zaporizhzhia.
“Dihet se që nga ora 13:00 (11:00 GMT) më shumë se 160 makina private arritën të largoheshin”, thuhet në një postim në internet. Ai tha se autokolona kishte arritur në qytetin e afërt të Berdyansk dhe po shkonte drejt Zaporizhzhia. “Ekziston gjithashtu konfirmim se një armëpushim aktualisht po mbahet përgjatë korridorit humanitar që është vendosur,” tha ai.
