Parlamenti Evropian ka bërë thirrje për ndalimin e “pasaportave të arta”, ose praktikës së lejimit të njerëzve nga jashtë bllokut për të marrë nënshtetësinë evropiane në këmbim të investimeve.
Ligjvënësit votuan me një shumicë të madhe votash për të ndaluar këtë në të ardhmen, duke përmendur rreziqet e sigurisë për qytetarët evropianë, duke përfshirë pastrimin e parave dhe korrupsionin.
Parlamenti Evropian tha se aktualisht dokumentet janë të disponueshme në Maltë, Qipro dhe Bullgari, megjithëse Qipro nuk pranon më aplikime të reja dhe Bullgaria synon t’i japë fund praktikës.
Duke pasur parasysh pushtimin rus të Ukrainës, Malta gjithashtu kohët e fundit u zotua se do të ndalojë lëshimin e pasaportave për rusët dhe bjellorusët.
Ligjvënësit ranë dakord gjithashtu që Komisioni Evropian të ndalojë dhënien e “vizave të arta” dhe të krijojë rregulla uniforme.
Ligjvënësit thanë gjithashtu se rusët nuk duhet të kenë më akses në pasaporta apo viza të tilla.
“Aktualisht, janë 12 vende anëtare që lëshojnë “viza të arta”, duke përfshirë Holandën, Spanjën, Italinë dhe Portugalinë”, tha Parlamenti Evropian.
Këto vende u kanë mundësuar më shumë se 132,000 njerëzve që të marrin leje qëndrimi ose shtetësi në shtetet anëtare të BE-së në këmbim të investimeve me vlerë 21.4 miliardë euro (23.6 miliardë dollarë), midis 2011 dhe 2019.
