Kanadaja duhet të vendosë një ndalim total për shitblerjen e të gjitha armëve, deklaroi kryeministri Justin Trudeau, sipas BBC.
Qeveria e tij po propozon një ligj të ri që do të ngrijë pronësinë private të të gjitha armëve të zjarrit me tytë të shkurtër.
Legjislacioni nuk do ta ndalojë plotësisht pronësinë e armëve, por do ta bëjë të paligjshme blerjen e tyre.
Propozimi i Trudeau vjen disa ditë pas të shtënave vdekjeprurëse në një shkollë fillore në Teksas, në SHBA, ku u vranë 21 persona.
Projektligji, i cili u prezantua në parlamentin e Kanadasë të hënën, e bën të pamundur blerjen, shitjen, transferimin ose importimin e armëve kudo në vend.
“Përveç përdorimit të armëve të zjarrit për sport dhe gjueti, nuk ka asnjë arsye që dikush në Kanada të ketë nevojë për armë në jetën e tij të përditshme”, tha Trudeau.
Kjo shënon përpjekjen më ambicioze të qeverisë së tij për të kufizuar aksesin në armë zjarri.
Projektligji do të kërkonte gjithashtu që karikatorët e pushkëve të rikonfiguroheshin në mënyrë që të mund të mbajnë jo më shumë se pesë fishekë në të njëjtën kohë.
Ndryshe nga SHBA, zotërimi i armëve nuk është i sanksionuar në kushtetutën e Kanadasë, por armët e zjarrit janë ende në përdorim, veçanërisht në pjesët rurale të vendit.
Kanadaja tashmë ka rregulla më të rrepta për zotërimin e armëve sesa fqinji i saj jugor dhe regjistron më pak incidente me armë zjarri.
Në prill 2020, një person i armatosur, i paraqitur si oficer policie, vrau 22 persona gjatë të shtënave në Nova Scotia, më vdekjeprurësit në historinë e Kanadasë./
