Zlatan Ibrahimovic do të jetë në gjendje të tregojë “Scudetton” në gjoks, sezonin e ri. Qendërsulmuesi suedez në fakt ka nënshkruar rinovimin e kontratës së tij me Milanin deri më 30 qershor 2023.
Siç raporton ‘Sky Sport’, vendimtare ka qenë vizita e Paolo Maldinit dhe Frederic Massara në vilën e sulmuesit të datëlindjes 1981, në liqenin Garda, ku hodhi mbi letër firmën për zgjatjen e “martesës” së dytë me kuqezinjtë, e cila filloi në seancën dimërore të tregut të transferimeve të janarit 2020.
Vëmendje e veçantë për shifrën, dukshëm më e ulët se në të kaluarën, që Ibrahimovic do të fitojë. Një bazë fikse që luhatet rreth një milion (ose një milion e gjysmë), me bonuse që lidhen me arritjet personale si asistet dhe golat e shënuar.
Një eventualitet që megjithatë nuk mund të ndodhë para vitit të ri, kur pritet të rikthehet në fushë Ibrahimovic, i cili përfundoi “nën thikë” në maj, menjëherë pasi fitoi titullin kampion, për të zgjidhur problemin e ligamentit të kryqëzuar të përparmë të gjurit të majtë. Ky dëmtim e kishte penguar seriozisht muajt e fundit të sezonit që shkoi.
Prandaj, suedezi do të jetë bashkë me kuqezinjtë në pragun e ditëlindjes së tij të 42-të, të planifikuar për 3 tetor 2023. Kush e di se, edhe atëherë, ai nuk do të jetë ende pjesë e familjes së Milanit, me të cilën hyri në simbiozë të përsosur.
