Hungaria ka shpallur gjendjen e jashtëzakonshme, si kundërpërgjigje ndaj ndërprerjeve të furnizimit dhe rritjes së çmimeve të energjisë në Evropë, sipas euronews.com.
Qeveria hungareze thotë se tani do të rrisë kapacitetet e saj vendase të prodhimit të energjisë për të siguruar furnizimin e menjëhershëm.
Gergely Gulyas, sekretari i përgjithshëm i kryeministrit, Viktor Orban, fajësoi luftën në Ukrainë dhe sanksionet e Bashkimit Evropian ndaj Rusisë për krizën energjetike të Evropës.
”Nuk ka gjasa të ketë gaz të mjaftueshëm në Evropë për sezonin e ngrohjes në vjeshtë dhe dimër”, tha ai në një konferencë shtypi në Budapest.
“Lufta e zgjatur dhe sanksionet nga Brukseli kanë bërë që çmimet e energjisë të rriten në mënyrë dramatike në të gjithë Evropën dhe në fakt një pjesë e madhe e Evropës është tashmë në një krizë energjetike”, shtoi Gulyas.
Budapesti thotë se do të rrisë prodhimin vjetor të gazit natyror nga 1,5 miliardë metra kub në dy miliardë metra kub.
Vendi anëtar i BE planifikon gjithashtu të rrisë nxjerrjen e qymyrit dhe të rivendosë një termocentral offline me linjit në Matra.
”Eksportet e energjisë do të ndalohen dhe centrali i vetëm bërthamor i Hungarisë do të zgjasë kohën e funksionimit për të rritur prodhimin”, tha Gulyas.
Qytetarët janë urdhëruar gjithashtu që të moderojnë konsumin ose të paguajnë tepricën me çmimin e tregut.
Masat, që bien ndesh me angazhimet e Hungarisë për klimën, janë vendosur të hyjnë në fuqi në gusht.
Orban ka luftuar kundër propozimeve të BE-së për të synuar eksportet ruse të naftës me sanksione duke argumentuar se masa të tilla do të dëmtonin ekonominë e vendit të tij.
Blloku më pas pranoi të lejojë përkohësisht importet e naftës nga tubacioni rus ”Druzhba”.
