FC Barcelona dhe Chelsea janë ende duke negociuar transferimin e Aubameyang pasi ditët e fundit nuk ka qenë e mundur të avancohet sa duhet për të mbyllur operacionin.
Lëvizja e fundit, sipas gazetarit Fabrizio Romano, është përfshirja sërish e Marcos Alonso në operacion. Klubi anglez dëshiron që mbrojtësi të jetë pjesë e marrëveshjes globale të transferimit, një pikë që Barça nuk e dëshiron sepse preferon të negociojë të dy operacionet veç e veç. Chelsea e vlerëson Alonson në rreth 8 milionë euro ndërsa klubi i Barçës kërkon të marrë rreth 30 milionë euro për shitjen e sulmuesit gabonez.
Nëse anësori do të hyjë në operacion, Barça do të kërkonte një transferim prej të paktën 20 milionësh, shifër që ‘blutë’ nuk e kanë arritur ende. Klubi londinez ka kërkuar gjithashtu nga FC Barcelona raportin mjekësor të Aubameyang pas sulmit që ai pësoi herët në mëngjes të dielën në shtëpinë e tij.
Ai do të duhet të qëndrojë jashtë për një muaj për shkak të thyerjes së nofullës. Në Chelsea ata nuk e konsiderojnë një problem të madh, por duan të kenë të gjithë informacionin.
