Sulmuesi francez, Karim Benzema, do të mungojë në Kupën e Botës FIFA të Katarit për shkak të lëndimit, tha Federata Franceze e Futbollit në një komunikatë gjatw mbrwmjes sw djeshme. “Karim Benzema u detyrua të ndërpresë stërvitjen kolektive pasi ndjeu dhimbje në kuadricepsin e kofshës së majtë”, thuhet në deklaratë. Rikthimi i 34-vjeçarit në stërvitje të plotë këtë të shtunë u kufizua nga dëmtimi i cili detyroi t’i nënshtrohej një testi MRI për të përcaktuar seriozitetin e dëmtimit. Testi zbuloi se fituesi i Topit të Artë vuan nga një dëmtim i rektusit të femurit, i cili do të kërkojë një periudhë rikuperimi trejavore.
Kjo ishte hera e parë që Benzema merrte pjesë në stërvitje të plotë që kur skuadra e Didier Deschamps u takua në selinë e tyre franceze në Clairefontaine të hënën e kaluar. Sulmuesi i Real Madrid është duke u trajtuar lidhur me një problem në kofshë që nga tetori dhe ka luajtur më pak se gjysmë ore futboll në gjashtë ndeshjet e fundit të klubit të tij.
“Jam jashtëzakonisht i trishtuar për Karimin që e bëri këtë Botëror një objektiv madhor. Pavarësisht kësaj goditjeje të re për ekipin francez, kam besim të plotë te grupi im. Do të bëjmë gjithçka për të përballuar sfidën e madhe që na pret”, tha trajneri i kombëtares.
Sipas rregullave të FIFA-s, Deschamps mund të kërkojë një zëvendësues për një lojtar të dëmtuar deri të hënën, në prag të ndeshjes së tyre të parë kundër Australisë.
