Jusef En-Nesiri ka marrë statusin e një heroi në Marok pas golit vendimtar që eliminoi Portugalinë në çerekfinalet e Kupës së Botës. Sulmuesi i Seviljes theu disa rekorde për kombëtaren që ka marrë statusin e Hirushes në këtë Botëror çudirash në Katar.
25-vjeçari u bë shënuesi më i mirë i Marokut në Kupën e Botës (3 gola) dhe me një efikasitet 100%, ndërsa i ka shënuar këto gola me vetëm tri goditje në kuadrat.
Ndërsa në listën e rekordeve hyri edhe portieri Jasin Bonu, i cili u bë portieri i parë afrikan i cili e ruajti portën e paprekur gjatë 3 ndeshjeve në një edicion të vetëm Botërori.
Por le t’i kthehemi atij që shkroi historinë të shtunën, duke kualifikuar për herë të parë në histori një skuadër afrikane në gjysmëfinalet e një Kupe Bote.
REKORDMENI – Kërcimi i Jusef En-Nesirit, i cili fitoi duelin me portierin Diogo Kosta, ishte historik në çdo aspekt.
Ai kërceu 2.78 metra dhe sipas televizionit “beIN Sports”, talenti që luan në La Liga theu rekordin e golit të Kristiano Ronaldos kundër Sampdorias (portugezi kërceu 2.56 metra në ndeshjen e 18 dhjetorit 2019- të).
“Jemi të gjithë të lumtur. Jam shumë i lumtur për fitoren dhe falënderoj shokët e skuadrës dhe tifozët. Pasi dështuam 4 vite më parë, i thashë shokëve të skuadrës se do të kishim fituar kundër Spanjës dhe Portugalisë”, deklaroi En-Nesiri në lot pas ndeshjes, ndërsa portieri Bonu i dorëzoi me të drejtë çmimin e lojtarit më të mirë në fushë.
Një dopioshuplakë për Kristiano Ronaldon, i cili përveçse është jashtë Botërorit duke u larguar në lot, i theu edhe rekordin e kërcimit të tij më të lartë.
Në momentin që Jasin Bonu bëri atë pritje shpëtimtare ndaj Kristiano Ronaldos, trajneri i Marokut, Valid Regragui, nisi të qante.
Portugalia po ushtronte presingun e fundit në kërkim të golit të barazimit, por mbrojtja e tij rezistoi në mënyrë mbresëlënëse: “Mendoj se është ndeshja e parë që qaj. U përpoqa t’i kontrolloj emocionet e mia, por ndonjëherë është shumë. Kisha frikë nga Ronaldo. Ju e dini që ai mund të shënojë nga asgjëja dhe është një prej futbollistëve më të mirë në botë, por Jasin është një portier i shkëlqyer. Emocionet shpërthyen dhe është e pamundur për marokenët që t’i kontrollojnë ato”.
