Nga Alba Malltezi/
Për fat të keq deformimi i realitetit vazhdon të jetë intensiv dhe i pandërprerë nga një grupim “reformues” brenda Partisë Demoktatike të Shqipërisë, por sidomos, akoma dhe më me këmbëmngulje vazhdon ky deformim nga ata që prezantohen si përfaqësues të interesave dhe aksioneve opozitare me të vlefshme për këtë parti.
Pyetja është: E bëjnë në interes të opozitës dhe të PD-së apo e bëjnë për interesa personale, pasi me qëndrime dhe veprime alogjike dhe të pavërteta kanë krijuar një profil të rremë dhe aspak konstruktiv si mbështetës të opozitës (pushtet edhe ky). Për të kuptuar se sa demode’ janë me qëndrimet e tyre gjoja në favor të opozitës, mjafton të shohim çfarë po ndodh në Itali me Partinë Demokratike sot në opozitë. Nuk ka studio televizive, nuk ka opinionbërës të mos kritikojnë gjendjen kaotike që ka përfshirë këtë parti të rëndësishme italiane që doli humbëse nga zgjedhjet më të fundit parlamentare ku në fron u ngjitën lehtësisht Fratelli D’Italia e Giorgia Melonit dhe e gjithë e djathta, përfshi Salvinin dhe Berluskonin.
Analizat kritikuese që kanë shpërthyer për të kërkuar, pretenduar rimëkëmbjen e PD-së italiane si opozitë ndaj pushtetit sot në Itali, nuk thërrmohen, anatemohen, shkallmohen siç ndodh prej shumë vitesh tashmë me kë përpiqet të kritikojë PD-në e marrë peng për afera dukshëm personale nga Sali Berisha dhe familjarët e tij. Dhe sidomos, askush në Itali nuk e çon as nëpërmend të artikulojë një mendin se “nëse PD italiane është sot në këtë pikë, kjo për faj të Fratelli D’Italia, të Legës apo të Forza Italia të Berluskonit”.
Pa përmendur pastaj shembujt që sillen në studio televizive shqiptare nga gjoja njohës të Italisë për politikën që bëhet në vendin fqinj. Ato janë aq të dëformuara, të rreme dhe qësharake sa nuk arrihet të kuptohet nëse bëhen pa dashje, thjeshtë nga padituria apo paaftësia për të kuptuar, apo bëhen kinse, me qëllim. Për t’u rimëkëmbur me të vërtetë e për t’u rikthyer si një Parti serioze dhe pretenduese shtetbërëse, Partia Demokratike Shqiptare duhet ta kishte bërë me kohë, por është ende në gjendje, (duke përdorur fjalët e pavend të njërës prej tyre) “të kapë prej zhelesh” ata që as të vërtetën dhe as gjendjen reale, nuk e kanë treguar ndonjëherë në atë Parti duke e përdorur vetëm për interesa personale biznesi apo familjare. Ky duhet të jetë 3 marsi i vlefshëm i ringjalljes së tyre.
