Superliga do zhvillojë në fundjavë javën e 27-të. Partizani kryesues udhëton për në Durrës, aty ku të shtunë në 18:00 i pret Teuta në “Niko Dovana”. Për transfertën delikate, trajneri Giovanni Colella ka marrë lajme të mira, teksa janë rikthyer gjashtë futbollistë.
Të impenjuar me kombëtaren, Andi Hadroj, Marcelino Preka dhe Paulo Buxhelaj janë vendosur në dispozicion të stafit të kuq. Lajm i mirë edhe nga infermieria. Telushi, Maguette dhe Menich kanë lënë pas problemet me dëmtimet, teksa janë gati për të luajtur në Durrës. E vetmja mungesë është ajo e Massanga Matondo, me 23-vjeçarin që është në grumbullim me kombëtaren e Kongos dhe pritet të kthehet në ekip.
Të kuqtë me 44 pikë mbajnë vendin e parë për shkak të ndeshjeve direkte kundër Tiranës, teksa edhe bardheblutë kanë po kaq pikë.
