Kombëtarja shqiptare e futbollit luan nesër në 20:45 me Moldavinë në “Air Albania”. Dueli është i vlefshëm për grupin E kualifikues të Europianit 2024, me kuqezinjtë që pas humbjes me Poloninë (1-0) kërkojnë tri pikët në shtëpi, për të shpresuar kalimin në fazën finale.
Trajneri i Kombëtares, Sylvinho e ka në mendje formacionin, teksa dje në stërvitjen e fundit ka pasur të gjithë grupin në dispozicion. Në portë pritet Strakosha, teksa mbrojtja me katër do jetë për Hysaj, Ismajli, Gjimshiti dhe Mitaj. Mesfusha pritet me tre, teksa ka balotazh mes Asllanit dhe Bajramit. Në sulm pritet Cikalleshi, i mbështetur nga Asani dhe Uzuni.
Në stadium pritet të jenë më shumë se 13 mijë tifozë, me ndeshjen që është e rëndësishme. Në katër ndeshje të zhvilluara kundër moldavëve, kuqezinjtë i kanë fituar të gjitha përballjet. Kujtojmë se Broja, Gjasula dhe Balliu janë të dëmtuar për tanët.
Formacioni i mundshëm:
Shqipëria XI (1-4-3-3): Strakosha – Hysaj, Ismajli, Gjimshiti, Mitaj – Bare, Ramadani, Bajrami (Asllani) – Asani, Uzuni, Cikalleshi Trajner: Sylvinho.
