Një 44-vjeçar, i cili la qëllimisht 2 kallëpe tritoli mbështjellë në qese në oborrin e banesës së shtetasit Kujtim Kaçurri për ta futur në kurth, është vendosur në pranga e policisë.
Mësohet se Sokol Mesiti, banues në Prezë, ka vendosur sasinë e lëndës plasëse në oborr dhe më pas ka njoftuar policinë që të arrestonin pronarin e banesës, Kujtim Kaçurri.
Qëllimi i tij, sipas policisë, ishte që 46-vjeçari të vendosej në pranga për mbajtje të lëndës eksplozive.
Kurthi i ngritur nga i Sokol Mesiti, u zbulua pasi pronari i banesës deklaroi se tritoli nuk ishte i tij dhe u hapën kamerat e sigurisë.
Në oborrin e kësaj banese u gjetën të mbështjella në një qese plastmasi dy kallëpe me lëndë të dyshuar plasëse tritol, së bashku me fitilin ndezës, dhe dy detonatorë, që u sekuestruan në cilësinë e provës materiale.
Njoftimi i policisë:
Vorë/Finalizohet operacioni policor i koduar “Mesnata”.
La një sasi lënde plasëse (tritol) në oborrin e banesës së një 46-vjeçari, gjatë natës, dhe më pas njoftoi Policinë, falë veprimeve të shpejta hetimore, identifikohet dhe vihet në pranga 44-vjeçari.
Nga veprimet hetimore dyshohet se 44-vjeçari e la lëndën plasëse në banesën e 46-vjeçarit dhe më pas njoftoi Policinë, me qëllim që pronari i banesës të ngarkohej me përgjegjësi penale, për mbajtje të lëndës eksplozive.
Sekuestrohen dy kallëpe me tritol, së bashku me fitilin ndezës, dy detonatorë dhe veshjet që ka mbajtur autori gjatë vendosjes së lëndës eksplozive.
Shërbimet e Komisariatit të Policisë Vorë, në vijim të punës për goditjen e paligjshmërisë në çdo formë të saj, pas kallëzimit se një shtetas mbante lëndë eksplozive në banesën e tij, menjëherë kanë organizuar operacionin policor të koduar “Mesnata”, për kapjen dhe vënien e autorit përpara përgjegjësisë ligjore.
Si rezultat i operacionit u arrestua shtetasi S. M., 44 vjeç, banues në Prezë.
Pas kallëzimit se shtetasi K. K., 46 vjeç, mbante lëndë plasëse (tritol) në banesë, shërbimet e Policisë kanë ushtruar menjëherë kontroll dhe në oborrin e kësaj banese kanë gjetur të mbështjella në një qese plastmasi dy kallëpe me lëndë të dyshuar plasëse tritol, së bashku me fitilin ndezës, dhe dy detonatorë.
Pas deklarimit të shtetasit K. K. se nuk ishte ai poseduesi i lëndës plasëse, shërbimet e Policisë kanë kryer veprime hetimore nga të cilat ka rezultuar se lënda plasëse ishte vendosur në oborrin e kësaj banese, nga shtetasi S. M., me qëllim që 46-vjeçari, pronari i banesës, të ngarkohej me përgjegjësi penale, për mbajtje të lëndës eksplozive.
Në cilësinë e provës materiale u sekuestruan dy kallëpet me tritol, së bashku me fitilin ndezës, dy detonatorët dhe veshjet që ka mbajtur autori gjatë vendosjes së lëndës eksplozive.
Materialet i kaluan Prokurorisë, për veprime të mëtejshme procedurale.
