Sërish nuk ishte që nga minuta e parë, por gjithsesi për të duhet folur. Kristjan Asllani e filloi nga stoli miqësoren e Interit ndaj Al Nasrit në Japoni, veçse trajneri Simone Inzagi vendosi ta aktivizonte menjëherë pas pushimit, dhe 21-vjeçari e tregoi veten.
Pasi zëvendësoi Hakan Çalhanoglunë, mesfushori kuqezi u tregua tepër aktiv dhe madje tentoi portën e sauditëve. Dy herë ai u përpoq të shënonte, dhe sidomos gjuajtja e dytë nga jashtë zone iu afrua shumë rrjetës, duke përfunduar fare pranë shtyllës.
Asllani shpreson që të ketë më shumë minutash këtë sezon, diçka që nuk e pati edicionin e kaluar, ndërsa situata mund të përmirësohet me largimin e kroatit Marcel Brozoviç pikërisht tek Al Nasri.
Shqiptari nuk ishte në fushë së bashku me yllin e sauditëve, Kristiano Ronaldon, pasi portugezi doli nga fusha në kohën që ai hyri. Përsa I përket miqësores, ajo përfundoi 1-1, madje ishin arabët që kaluan të parët në avantazh.
Abdulrahman Garib shënoi për skuadrën aziatike, ndërsa Davide Fratezi barazoi një minutë përpara përfundimit të pjesës së parë. Në 1 gusht, Interi do të luajë miqësoren e radhës ndaj Paris SG, veçse këtë herë jo në Osaka, por në Tokio.
