A po e synon titullin Juventusi? Dhe nëse po, a është me të vërtetë favoriti, duke pasur parasysh mungesën e angazhimeve në Kupat e Europës? Të gjithë tek Interi janë të bindur se ky është rasti, të bashkuar në opinionet e tyre nga Marotta tek Inzaghi.
Ndoshta është edhe bestytni, sigurisht lojë me role. Një lojë që Allegri nuk i është shmangur asnjëherë deri më tani, por me filozofinë e pragmatizmit, të menduarit vetëm për ndeshjen e radhës, ka marrë kryesimin si ndjekës i zikaltërve. Tani, në përplasjen direkte të nesërme, ka shansin ta ngjisë në krye Juven.
“Ne po luajmë kundër favoritit të kampionatit, – tha trajneri bardhezi në konferencë. – Për ne do të jetë një test i mirë në rrugën e rritjes. Po e përjetojmë këtë derbi në mënyrën më të mirë të mundshme”. Dyshimi ka të bëjë me Locatellin: “Ai është më mirë, do të vendos nëse do të luajë nga fillimi apo gjatë lojës”.
Si po e prisni këtë ndeshje?
Në mënyrën më të mirë të mundshme po përgatitemi për ndeshjen e nesërme. Lojtarët janë kthyer mirë nga kombëtaret e tyre.
Çfarë qëndrimi dëshironi të shihni nga Juventusi juaj?
Për ne është një ndeshje shumë e rëndësishme, sepse e shohim si konfirmim rritjeje. Do të luajmë kundër favoritëve të kampionatit, siç thanë edhe ata vetë, nuk është diçka e re.
Çfarë mund të thotë kjo ndeshje psikologjikisht?
Ndeshja e nesërme nuk vendos asgjë, por është një sfidë e rëndësishme. Lojtarët me probleme dëmtimesh janë më të gatshëm. Kthehet Alex Sandro, Danilo do ta bëjë këtë para Monza, ndërsa për Weah le të shohim. Locatelli ka qenë duke u stërvitur, por vetëm nesër do të vendos nëse do të luajë nga fillimi.
Pse Interi është favorit?
Nuk mendoj se po e zemëroj Interin, vetë ata thanë se objektivi kryesor është titulli. Për ne është një sprovë e mirë.
Mbi çfarë baze do t’i bëni zgjedhjet tuaja në mesfushë dhe sulm?
Ne kemi Nicolussi-Caviglia, Cambiaso mund të luajë si mesfushor. Ka zgjidhje, edhe Iling mund të luajë më i centralizuar. Të ndryshoj formacionin pas 12 ndeshjesh nuk më duket e drejtë, ndoshta ndërkohë që ndeshja është duke u zhvilluar, por nuk kemi asnjë problem në mes të fushës. Të gjithë po bëjnë shumë mirë, pavarësisht se kush e nis apo vjen nga pankina.
A mund të startojë Vlahovic?
Do të vendos para ndeshjes. Chiesa u kthye nga kombëtarja, ku bëri lojëra të mira, siç bëri me ne. Kean dhe Milik janë mirë. Nesër do të vendos mes njërit nga tre ata që do të jetë qendërsulmuesi. Njëri mes Kean dhe Vlahovic le të themi.
Si e përjeton grupi këtë ndeshje?
Ky është derbi italian, lojtarët janë gati për të luajtur. Duhet një paraqitje e mirë kundër një ekipi të fortë. Ndeshjet e shkëlqyera fitohen në detaje.
Cilat janë vështirësitë e përballjes me skuadrat e Inzaghit?
Skuadrat e tij sigurisht që pësojnë pak gola…
Kush mund të luajë para mbrojtjes, pa Locatelli?
Kam Mirettin, por vlerësimet e mia do t’i bëj në bazë të ndryshimeve.
Si i shpjegoni golat e pakët të Vlahovicit? A ju ngacmoi Marotta?
Mundem vetëm ta komplimentoj Marottën, është një komunikues i shkëlqyer. Vlahovic do t’i rikthehet shënimit të golave të rëndësishëm, sepse është një lojtar me vlerë të madhe.
A e kishit pritur që të ishit 2 pikë prapa Interit në ndeshjen kokë më kokë?
Gara për titullin nuk kufizohet vetëm tek Interi dhe Juventusi. Milani dhe Napoli do të luftojnë, por ne duhet të vazhdojmë kështu. Domethënë të fitojmë ndeshjet.
