Raphael Dwamena vuante prej kohësh nga zemra. Sulmuesi ganez, autor i 8 ndeshjeve dhe 2 golave me kombëtaren afrikane, kishte premisa për të zhvilluar një karrierë cilësore.
600 mijë euro paguan zviceranët e Zurich për ta blerë nga austriakët e Austria Lustenau në janarin e vitit 2017. Ndërkohë që rekordin e vendosi në verën e vitit 2018. Kur u transferua nga Zurich te Levante për 6.2 mln euro! Dwamena vuajti në Spanjë për shkak të problemeve në zemër. Në fillim erdhi huazimi te Zaragoza dhe më pas ndërprerja e bashkëpunimit.
Sulmuesi kaloi në Danimarkë te Vejle në gushtin e 2020-s. Në shkurtin e vitit 2021 mbeti pa ekip, periudhë që zgjati mbi një vit e gjysmë. Sulmuesi shtatlartë ishte pranë kalimit tek anglezët e Brighton vite më parë (2017). Akordi u arrit për 1 mln euro, por gjatë testeve mjekësore iu zbuluan problemet në zemër.
Afrikani u rikthye në Austri pas periudhës pa skuadër, duke firmosur me Blau Weiss Linz në verën e vitit 2021. Dwamena u rrëzua gjatë një ndeshjeje kupe në Austri tetorin e dy viteve më parë. Dy muaj pas ngjarjes së frikshme, sulmuesi, i cili më pas hoqi defibrilatorin, shprehej:
“Perëndia gjithmonë ka menduar mirë për mua”. Në gushtin e vitit të kaluar u bë pjesë e BSC Old Boys, skuadër e divizionit të pestë në Zvicër. Dhe më pas erdhi transferimi në Shqipëri tek Egnatia në janarin e këtij viti.
