Testet mjekësore që Raphinha kreu këtë të premte konfirmuan se braziliani ka pësuar një dëmtim muskulor në bicepsin femoral të këmbës së majtë, kështu që ai do të mungojë në finalen e së dielës kundër Realit të Madridit. Barça informoi përmes një njoftimi për shtyp se rezonanca magnetike konfirmoi atë që u paralajmërua që në momentet e para pas dëmtimit në “Al Awwal”.
Braziliani mbetet jashtë finales së të dielës dhe koha e riaftësimit të plotë, që mund të jetë disa javë, do të mësohet hap pas hapi. Raphina ndjeu dhimbje në bicepsin femoral të këmbës së majtë gjatë pjesës së parë kundër Osasunës. Ai u zëvendësua nga Yamal, autor i golit të dytë të “blaugranave” në kohën shtesë.
27-vjeçari është pjesë e rëndësishme në formacionin e Xavi Hernándezit, që e ka opsion të parë në krahun e djathtë. Ai ka luajtur në 20 ndeshje në këtë sezon. Në finalen e Superkupës (El Clasico), Xavi ka dy alternativa: Yamal dhe Ferran Torres.
