Sfida e Olimpico mes Lazio dhe Milan e përfunduar me rezultatin 0-1 në favor të kuqezinjve pati shumë tension.
Kryeqytetasit i përfunduan 90 minutat me tetë lojtarë pas tre kartonëve të kuq të akorduar nga arbitri Di Bello.
Tensioni që përfshiu fushën e lojës, u reflektua edhe në konferencën për shtyp pas ndeshjes të trajnerit Stefano Pioli.
Ky i fundit e braktisi konferencën për shkak të një pyetje rreth Christian Pulisic. Një prej gazetarëve e pyeti Piolin nëse Pulisic u tregua antisportiv në kartonin e dytë të verdhë për Pellegrinin (amerikani nuk e ndali lojën pasi një lojtar u dëmtua).
“Timonieri” i kuqezinjve e mbrojti deri në fund lojtarin e tij dhe më pas braktisi konferencën.
A u tregua Pulisic antisportiv, u pyet ai?
“Kjo është një pyetje e cila nuk qëndron dhe për të cilën unë nuk jam aspak dakord. Nuk mund të vendosim në peshore nëse Pulisic është një njeri i mirë apo i keq, për mendimin tim nuk kishte asnjë gjest antisportiv. Ai respektoi deri në fund rregulloren”, u shpreh Pioli që më pas u largua i revoltuar.
