Në sezonin e kaluar, Partizani kampion i Shqipërisë, ia doli të shkonte deri në fazën “play-off” të Ligës së Konferencës, ku u eliminua nga kazakët e Astanës.
Nga eksperienca europiane e edicionit të kaluar, klubi i kuq siguroi 1 milion e 410 mijë euro nga shpërblimet që akordon UEFA. Mirëpo, me sistemin e ri të shpërndarjes së bonuseve për klubet, fitimet e Partizanit do të ishin 1 milionë e 710 mijë euro. Për shkak të renditjes së ulët të kampionatit shqiptar në klasifikimin e përgjithshëm të UEFA-s, skuadrat tona e nisin të gjitha pjesëmarrjen e tyre nga niveli më i ulët i kualifikueseve të kompeticioneve (Liga e Kampioneve dhe Liga e Konferencës).
Klubi fitues i Superiores luan në raundin e parë kualifikues të Ligës së Kampioneve. Fituesi i Kupës së Shqipërisë dhe klubet që përfundojnë kampionatin në vendin e dytë dhe të tretë, e nisin garën e tyre në turin e parë kualifikues të Ligës së Konferencës. Ndërkohë, nëse bëjmë një krahasim me Kosovën, për shkak të rezultateve fantastike që ka arritur Ballkani në Kupat e Europës, kampionati kosovar do të përfaqësohet këtë vit edhe me një klub në Ligën e Europës.
