Autoritetet ruse akuzuan SHBA-në se dëshiron të vendosë armë në hapësirë, një ditë pasi Këshilli i Sigurimit i OKB-së hodhi poshtë një projekt-rezolutë ruse mbi këtë temë dhe pas një akuze të ngjashme nga Uashingtoni në Moskë.
Këto akuza dhe kundërakuza po ringjallin frikën, e munguar që nga Lufta e Ftohtë, për një garë të mundshme armatimesh, pavarësisht ekzistencës së një traktati të hapësirës së jashtme të vitit 1967 që bën thirrje për “moszhvillimin e armëve bërthamore ose ndonjë armë tjetër të shkatërrimit në masë, posaçërisht për vendosjen në orbitë“.
Zëdhënësja e diplomacisë ruse, Maria Zakharova, vlerësoi se refuzimi amerikan i projekt-rezolutës tregon se SHBA-ja synon “të vendosë armë në hapësirë dhe ta bëjë atë një arenë konfrontimi ushtarak”.
“Një mundësi e re për të parandaluar një garë armësh në hapësirë u humb për fajin e SHBA-së dhe aleatëve të saj,” tha Zakharova.
Në fund të prillit, SHBA dhe Japonia paraqitën projekt-rezolutën e tyre në Këshillin e Sigurimit të OKB-së për të parandaluar militarizimin e hapësirës, por Rusia vuri veton ndaj saj, duke kritikuar faktin se teksti fokusohet vetëm në një lloj arme, armët bërthamore.
Projekt-rezoluta e paraqitur nga Rusia dhe Kina të hënën, e cila përfshinte pjesërisht tekstin e bllokuar në prill, u bën thirrje gjithashtu të gjitha vendeve anëtare të marrin “masa urgjente” për të parandaluar përgjithmonë vendosjen e armëve në hapësirë dhe kërcënimin ose përdorimin e forcës në hapësirë.
Megjithatë, ai draft nuk mblodhi nëntë votat e nevojshme për miratim.
Zëvendësambasadori i SHBA-së Robert Wood (Wood) e quajti nismën ruse “hipokrite”, duke thënë se Moska dëshiron “të tërheq vëmendjen nga përpjekjet e saj të rrezikshme për të vënë armët bërthamore në orbitë”.
