Komisioni Europian gjobiti Mondelez International, Inc. 337.5 milionë euro. Gjoba është për parandalimin e tregtisë ndërkufitare të çokollatës, biskotave dhe produkteve të kafesë ndërmjet shteteve anëtare, në shkelje të rregullave të konkurrencës së BE-së, sipas një deklaratë të Komisionit. Komisioni thekson se mbetet i përkushtuar për heqjen e barrierave të pajustifikuara për të siguruar funksionimin më të mirë të tregut të vetëm.
Mondelez, me qendër në SHBA, është një nga prodhuesit më të mëdhenj të produkteve të çokollatës dhe biskotave në botë.
Portofoli i saj përfshin marka të njohura të çokollatës dhe biskotave si Côte d’Or, Milka, Oreo, Ritz, Toblerone dhe TUC dhe deri në vitin 2015 marka kafeje si HAG, Jacobs dhe Velours Noir.
Hetimi i Komisionit zbuloi se Mondelez ka shkelur rregullat e konkurrencës së BE-së, duke hyrë në marrëveshje antikonkurruese ose praktika të bashkërenduara që synojnë kufizimin e tregtisë ndërkufitare të produkteve të ndryshme të çokollatës, biskotave dhe kafesë dhe duke abuzuar me pozitën e saj dominuese.
Komisioni Europian arriti në përfundimin se praktikat e paligjshme të Mondelez i penguan shitësit me pakicë të ishin në gjendje të merrnin lirisht produkte në Shtetet Anëtare me çmime më të ulëta dhe “fragmentuan” artificialisht tregun e brendshëm.
Qëllimi i Mondelez, siç vë në dukje Komisioni, ishte të shmangte që tregtia ndërkufitare të çonte në ulje të çmimeve në vendet me çmime më të larta. Praktika të tilla të paligjshme kanë lejuar Mondelez të vazhdojë të tarifojë më shumë për produktet e veta, në dëm të konsumatorëve të BE-së.
