Ditën e sotme kanë dalë në dritë detaje të reja nga ngjarja tronditëse në Shkodër, ku u vetëmbyt Alma Arazi, së bashku me 3 fëmijët e saj të mitur, 9, 6 dhe 3 vjeç.
Gazetari Erald Harlicaj, teksa ishte i ftuar në “Breaking”, zbulon se është bërë e mundur këqyrja e telefonit të Ergys Arazit, bashkëshorti i Almës dhe babai i tre fëmijëve, i arrestuar si shkaktar i vetëvrasjes, për shkak të dhunës. Sipas tij në telefon janë gjetur biseda me tone kërcënuese nga ana e Ergysit kundrejt Almës dhe është vërtetuar se ka pasur një lidhje jashtëmartesore, të cilën e kishte prezantuar me fëmijët.
“Është bërë këqyrja e telefonit të Ergys Arazit. Janë zbuluar mesazhet e fundit që ka shkëmbyer me zonjën e ndjerë. Është kuptuar që marrëdhënia e tyre ka qenë krejt e krisur, sepse në bisedat me njëri tjetrin ka qenë shumë e ftohtë. Madje ka pasur edhe tone kërcënuese nga ana e Ergysit. Janë vërtetuar edhe dyshimet që ka pasur një lidhje jashtëmartesore, nga këqyrja e telefonit, sepse janë zbuluar biseda, video dhe foto me të dashurën e tij të re, ku është kuptuar se kishte një jetë të dyfishtë”, tregon Harlicaj.
Sipas familjarëve, thotë gazetari, një ndër arsyet që e shtyu Alma Arazi të kryejë aktin e vetëvrasjes, është sepse Ergysi e ka prezantuar të dashurën e tij të re me fëmijët.
“Kohët e fundit Ergysi kishte bërë prezantimin e të dashurës së re me fëmijët, madje kishte edhe foto në telefon që i mbante me djalin 3-vjeçar apo vajzën e vogël”, thotë ai.
