Dihet mirë se çfarë vlere ka. Është vetëm 20-vjeç, por Mario Mitaj e tregoi veten edhe në këtë Kampionat Evropian. Mbrojtësi “kuqezi” ishte i dalluar dhe u veçua nga agjencitë e statistikave për kontributin e dhënë për Kombëtaren shqiptare, sidomos përsa i përket pasimeve.
Agjencia “Opta Sports” e vendosi Mitajn në vendin e 8-të në renditjen e lojtarëve që dhanë më shumë pasime ndërmjet linjave në Gjermani, të paktën për fazën e grupeve, me futbollistin e Lokomotiv Moskow, që dha 37 pasime të tilla, duke qenë shumë pranë vendit të dytë, që mbahet nga lojtari i Italisë, Giovanni Di Lorenzo.
Mitaj ishte titullar në të treja ndeshjet e Shqipërisë në Grupin B, ndaj Italisë, Kroacisë dhe Spanjës, duke u paraqitur përgjithësisht në nivel të mirë. Në total, ai ka 16 ndeshje me kombëtaren, aspak keq duke pasur parasysh moshën e re. Lojtari më i dalluar për pasimet në fazën e parë të Kampionatit Evropian ishte mesfushori i Gjermanisë, Toni Kroos, me 102 tentaviva të sakta.
