Moska ka rritur masat e sigurisë rreth rezidencës së Presidentit Vladmir Putin në veri të Moskës. Imazhet satelitore kanë zbuluar se disa sisteme të mbrojtjes ajrore “Pantsir-S1” janë instaluar në afërsi të rezidencës presidenciale në liqenin Valdai në rajonin e Novgorod.
Rezidenca Valdai mund të jetë objektiv i profilit të lartë, pasi Putini dihet se po kalon kohë atje gjatë verës. Prona e pallatit ndodhet brenda një resorti të madh pushimesh qeveritare në parkun kombëtar Valdai, në një gadishull të ndarë midis dy liqeneve.
Qasja në të gjithë kompleksin është rreptësisht e kufizuar.
Imazhet satelitore tregojnë mbrojtjet ajrore të pozicionuara në mënyrë strategjike në zonë, duke përfshirë një kullë të vendosur thellë në pyll vetëm disa kilometra larg kompleksit.
Sistemet “Pantsir-S1” janë krijuar për të luftuar raketat dhe dronët me rreze të shkurtër veprimi. Kjo mund të jetë një përgjigje ndaj sulmeve gjithnjë e më të guximshme të Ukrainës me dron.
Deri më tani, Kievi ka pretenduar se dronët ukrainas dëmtuan rëndë disa anije luftarake ruse në Detin e Zi dhe shkaktuan dëme në urën e ngushticës Kerç midis Rusisë dhe Krimesë së Ukrainës, e aneksuar nga Rusia në 2014.
