Prokuroria e Tiranës ka mbyllur hetimet dhe ka dërguar për gjykim 3 ish-zyrtare të komunës se Bërxullës.
Bëhet fjalë për shtetasit Ymer Marku, Kujtim Balliu dhe Agim Loci.
Ata akuzohen për “Shpërdorim detyre” si dhe Kujtim Allmeta për falsifikim të dokumentava.
Marku, Balliu dhe Loci akuzohen se kanë tjetërsuar një sipërfaqe toke prej 7500m2 që në fund u përfitua në mënyrë të paligjshme nga Kujtim Allimeta.
Ky është vetëm rasti i parë i dokumentuar për tjetërsimin e pronave, pasi ka dhe raste të tjera që janë kallëzuar kundër ish-kryetarit të Komunës, “Bërxullë”, Ymer Marku.
Në njoftimin e prokurorisë thuhet se zyrtarët lejuan përvetësimin e 7500m2 tokë me dokumente të falsifikuara, Prokuroria e Tiranës çon në gjyq tre ish-zyrtarët e Komunës Bërxullë për “Shpërdorim detyre” dhe shtetasin Kujtim Allmeta për “Falsifikim të dokumenteve”.
Prokuroria Tiranë përfundoi hetimet për procedimin penal nr.5783 të datës 16 shtator 2020 dhe dërgoi në gjyq katër persona, mes tyre tre ish-zyrtarë të komunës Bërxullë, për veprat penale “Shpërdorim Detyre”, “Falsifikim të dokumenteve” dhe “Pastrimi i produkteve të veprës penale”.
Sipas prokurorisë, Ymer Marku, Kujtim Balliu dhe Agim Loci në bashkëpunim me njëri-tjetrin, lejuan përfitimin e paligjshëm nëpërmjet falsifikimit të 7500 m2 tokë në Bërxullë nga Kujtim Allmeta, i cili më pas e shiti në vlerën 10.000.000 lekë, tek Arbër Abazi, nip i deputetit Sadri Abazi.
Bazuar në veprimet hetimore, deklarimet e marra, provat e mbledhura dhe ekspertimi i kryer, prokuroria arriti në konkluzionin se Allmeta ka kryer krimin e falsifikimit me pasoja të rënda për personat e tretë.
Nëpërmjet dokumenteve të falsifikuara, ai është pajisur me çertifikatë pronësie për pasurinë në Bërxullë 7500m2 dhe më pas në vitin 2020 e shiti duke përfituar shumën prej 10.000.000 lekësh.
Po kështu, nga hetimet rezultoi se të pandehurit, Ymer Marku, Kujtim Balliu dhe Agim Loci, konsumuan veprën penale të “Shpërdorimit të detyrës”, pasi kryen veprime në kundërshtim me ligjin.
Këta punonjës me veprimet dhe mosveprimet e tyre kanë cenuar interesat e personave të tretë për shkak të dëmit të konsiderueshëm ekonomik që u ka ardhur si pasojë e tjetërsimit të paligjshëm të pasurisë së tyre.
Kujtim Balliu, nga muaji korrik 2011 deri në shtator 2015 ka mbajtur postin e Përgjegjësit të Zyrës së Mbrojtjes dhe Menazhimit të Tokës, në Komunën Bërxullë, duke ndërvepruar me ish-zyrtarët e tjerë, mes tyre dhe ish-kryetarin e Komunës dhe punonjësin tjetër, përpiloi shkresat për regjistrimin e pasurisë në emër të Allmetës pa kryer verifikimin e dokumentacionit.
Me kërkesë të prokurorisë, 7500m2 tokë e përfituar me dokumente të falsifikuara është sekuestruar.
Hetimet për këtë rast vijojnë edhe për sa i përket pasurisë së zyrtarëve të implikuar në këtë skandal./Ora
