Më shumë se 250 artikuj që më parë i përkisnin Marilyn Monroe do të ekspozohen në Mbretërinë e Bashkuar për herë të parë. Ekspozita do të shkojë në Londër në tetor, me letrat e dashurisë së aktores, rrobat prej sateni dhe grimin e ekspozuar për publikun.
Ato vijnë nga koleksioni privat i Ted Stampfer, i cili zotëron më shumë se 1500 artikuj në pronësi të yllit të Hollivudit. Pikat kryesore të ekspozitës përfshijnë artikuj nga kompania e saj e prodhimit, kujtime nga xhirimet e saj në Londër dhe imazhe nga takimi i saj me Mbretëreshën Elizabeth II.
Disa nga veshjet e saj më të famshme do të jenë gjithashtu të disponueshme për t’u parë, duke i çuar vizitorët përmes origjinës së saj si Norma Jeane Mortenson, në jetën si një figurë publike legjendare.
Make-upe, këpucë dhe artikuj bukurie do të përbëjnë gjithashtu pjesë të ekspozitës, kur koleksioni të shfaqet në Arches London Bridge më 18 tetor. Stampfer, i cili ka kuruar ekspozitën, thotë se është “i kënaqur” që koleksioni i tij personal do të ekspozohet në Londër.
“Në vitin 1962, pas vdekjes së saj, sendet u ruajtën pothuajse si në një kapsulë kohe, për gati katër dekada”, shtoi ai. “Është e mrekullueshme të jesh në gjendje të ndash këto pjesë unike që mund të na japin një pasqyrë të vërtetë në jetën e saj, duke na lejuar sot të afrohemi me Marilyn Monroe dhe identitetin e saj të vërtetë.”
Pavarësisht se vdiq më shumë se 60 vjet më parë, Marilyn Monroe mbetet një figurë e madhe e kulturës pop globalisht. Ajo vdiq nga një mbidozë droge në shtëpinë e saj në Los Anxhelos në moshën 36 vjeçare, me vdekjen e saj të cilësuar si një vetëvrasje e mundshme.
