Konsiderohet si një thesar, ndaj dhe etnologët e kostumografët kanë kthyer sytë nga veshjet popullore, duke folur me krenari për traditën e zonës së Lezhës.
E pasur me kostume popullore, një nga manifestimet më të fuqishme të kulturës, traditave dhe dokeve të kësaj krahine sollën në ditën e trashëgimisë kulturore ngjyrat, historinë dhe elementë identiteti, të ridimensionuara në pavijone të veçanta.
Të ruash traditën është shumë më tepër sesa të qepësh një veshje, ndaj dhe për kostumografët rëndësi të veçantë po i jepet prej disa vitesh restaurimit të veshjeve popullore. Veshjet e vendosura në Pallatin e Kulturës, ambientet e të cilit janë rikonstuktuar janë një tjetër atraksion turistik për qytetin e Lezhës, që ofron një ndërthurje të turizmit kulturor e historik, me atë të aventurës dhe plazheve të mrekullueshme të Adriatikut.
