Me shumë mundësi, e kemi humbur edhe këtë herë.
Berat Gjimshiti, kapiteni i Kombëtares shqiptare, pritet të mos jetë I gatshëm për grumbullim për dy ndeshjet e radhës në Ligën e Kombeve.
Mbrojtësi I qendrës duket se ende nuk e ka kaluar plotësisht dëmtimin e pësuar në mesjavë, dhe Atalanta nuk e përfshiu në skuadër për ndeshjen e kësaj të shtune ndaj Xhenoas në Serinë A.
Trajneri Gasperini vendosi të mos rrezikonte.
Kjo do të thotë se shanset e Gjimshitit për t’u bashkuar me kuqezinjtë janë të pakta, pasi edhe trajneri Silvinjo pohoi se lojtari do të vinte nëse do të ishte gati për ndeshjen e radhës.
Tashmë, mbetet që dy stafet mjekësore të bisedojnë dhe të gjejnë një akord.
Gjimshiti u dëmtua në përballjen e Championsit, që Atalanta e fitoi 3-0 ndaj Shahtarit të Donjeckut në Gjermani, dhe në të cilën ai realizoi golin e parë.
Futbollisti 30-vjeçar nuk ishte në dispozicion as në dy sfidat e shtatorit në Ligën e Kombeve, fituar 2-1 në Pragë ndaj Ukrainës, dhe humbur 0-1 në “Arenën Air Albania” kundër Gjeorgjisë.
Kombëtarja luan në 11 tetor në Çeki dhe në 14 të po këtij muaji në fushën e Gjeorgjisë, duele që do të përcaktojnë fatin tonë në grupin e Nivelit B të këtij konkurrimi.
