Pluhuri rreth dhënies së Topit të Artë 2024 ende nuk është qetësuar dhe për këtë ka dhënë mendimin e tij edhe trajneri i Manchester City, Pep Guardiola, ylli i të cilit, Rodri, mori çmimin individual më prestigjioz në botën e futbollit.
Vinicius Junior ishte një favorit i madh, por në ditën e dhënies së çmimit ai zbuloi se Rodri ishte fituesi i çmimit dhe për këtë arsye i gjithë delegacioni i Real Madridit nuk pranoi të shkonte në Paris për ceremoninë e ndarjes së çmimit.
Për Guardiolën, nuk ka asgjë të diskutueshme.
“Nëse ata do të vinin, do të ishte në rregull. Nëse nuk e bënë, kjo është gjithashtu në rregull. Nëse ata duan të urojnë fituesin, mirë. Nëse nuk duan, ata nuk duhet të bëjnë, dhe kjo është gjithashtu në rregull. Ne nuk gjykojmë klubet e tjera apo vendimet e tyre se çfarë duhet të bëjnë dhe çfarë jo”, ka thënë fillimisht Guardiola.
Më pas Guardiolës iu drejtua një pyetje specifike – nëse ai mendon se Vinicius Jr duhet të kishte fituar Topin e Artë.
“Ndoshta duhet të kishte fituar, por çmimin e vendosin gazetarët, jo njerëzit elitarë. Dhe gazetarët nga e gjithë bota, të cilët kanë mendime të ndryshme”.
“Vitin e kaluar, Erling Haaland e meritoi Topin e Artë, por edhe Lionel Messi e meritoi atë. Unë i thashë Rodrit para se të merrte vesh se ai fitoi se ai duhet të jetë i lumtur që është në mesin e dy, tre lojtarëve më të mirë në botë, kjo është diçka e madhe”, përfundoi trajneri i Cityt.
