Presidenti i Lituanisë Gitanas Nauseda i bëri thirrjeNATO-s që t’i përgjigjet ndihmës së Koresë së Veriut në luftën e Rusisë kundër Ukrainës dhe t’i sigurojë Kievit gjithçka që i nevojitet për të fituar. Përfshirë lejen për goditje në territorin e Rusisë me armë perëndimore. “Trupat koreano-veriore po ndihmojnë Rusinë në luftën kundër Ukrainës”.
“NATO duhet të përgjigjet duke i ofruar Ukrainës gjithçka të nevojshme për fitoren: raketa me rreze të gjatë, leje për të goditur objektet ushtarake në Rusi, rritjen e ndihmës ushtarake”, shkroi Nauseda në Platformën X. Sipas tij, “pavendosmëria çon në përshkallëzim dhe jo anasjelltas”. Sekretari i Përgjithshëm i NATO-s Mark Rutte konfirmoi të hënën praninë e trupave të Koresë së Veriut në Rusi dhe vendosjen e tyre në rajonin e Kurskut për të marrë pjesë në luftën kundër Ukrainës.
Departamenti Amerikan i Mbrojtjes ka të dhëna për transferimin e rreth 10 mijë ushtarëve nga Koreja e Veriut në Rusi për stërvitje, si dhe për pjesëmarrjen në luftën e Federatës Ruse kundër Ukrainës. Presidenti Volodymyr Zelensky tha se 3000 ushtarë të Koresë së Veriut tashmë po luftojnë në anën e Rusisë dhe së shpejti, siç tha ai, numri i tyre do të rritet në 12,000.
