Bitcoin u rrit në një nivel rekord të mërkurën, duke arritur mbi 90,000 dollarë, pasi tregu i kriptomonedhave reagoi pozitivisht ndaj angazhimit të presidentit të sapozgjedhur Donald Trump për të reduktuar kufizimet rregullatore për asetet dixhitale.
Të dhënat treguan se Bitcoin u ngjit në një nivel të paparë prej 91,000 dollarësh përpara se të ulej pak në 90,670 dollarë, duke reflektuar besimin e fortë të investitorëve të nxitur nga ndryshimet e parashikuara të politikave në favor të kriptomonedhës. Të martën Bitcoin u bë aseti i tetë më i madh në botë pas suksesit zgjedhor të Trump.
Kriptovaluta kapërceu argjendin për t’u bërë aseti i tetë më i madh në botë, duke arritur një kapitalizim tregu prej 1.752 trilionë dollarësh dhe duke tejkaluar për pak 1.726 trilion dollarë të argjendit. Në vazhdën e fitores së Trump ndaj Kamala Harris në zgjedhjet presidenciale të 5 nëntorit, monedha tradicionale, tregjet e kriptomonedhave, aksionet individuale dhe aksionet amerikane kanë parë të gjitha fitime të konsiderueshme.
Investitorët po i përgjigjen pritjeve për derregullim dhe ulje të mundshme të taksave nën presidentin e 47-të të SHBA. Kjo rritje e tregut, e quajtur “Efekti Trump” nga platforma e lajmeve Techgraph, pasqyron optimizmin rreth politikave të parashikuara ekonomike që favorizojnë rritjen e biznesit dhe investimet. Që nga e marta, vlerësimi i Bitcoin është rritur ndjeshëm, duke iu afruar kufirit të tregut prej 1.804 trilion dollarësh të Saudi Aramco, gjigantit saudit të naftës dhe gazit natyror të kontrolluar nga shteti. Megjithatë, Bitcoin ende mbeti pas liderëve të teknologjisë duke përfshirë Microsoft, Apple, Google dhe NVIDIA, të cilët mbajnë pozicionet kryesore në nivel global. Ari mbetet aktivi më i vlefshëm në botë, me një kapitalizim tregu të pakrahasueshëm prej 17.6 trilion dollarë të martën.
