Presidenti francez, Emmanuel Macron do të zhvillojë takime të veçanta dypalëshe me homologun e tij ukrainas Volodymyr Zelensky dhe presidentin e zgjedhur të SHBA-së, Donald Trump, përpara ceremonisë së rihapjes së katedrales Notre Dame të shtunën, njoftoi presidenca franceze.
Kjo do të jetë vizita e parë e Trump jashtë vendit që nga fitorja e tij në zgjedhjet e 5 nëntorit, e cila shënon edhe rikthimin e tij në skenën botërore. Në fokus të diskutimeve pritet të jetë edhe Ukraina.
Udhëheqësit evropianë janë të shqetësuar se Trump mund të tërheqë ndihmën ushtarake të SHBA për Ukrainën në një moment vendimtar në luftën e saj për të zmbrapsur pushtuesit rusë. Macron është një mbështetës i fortë i NATO-s dhe Ukrainës, ndërsa Trump mendon se vendet evropiane duhet të paguajnë më shumë për mbrojtjen e përbashkët dhe se nevojitet një zgjidhje e negociuar për t’i dhënë fund luftës.
Dhjetëra liderë globalë dhe zyrtarë të rangut të lartë, duke përfshirë Zonjën e Parë aktuale Jill Biden dhe presidentin gjerman Frank-Walter Steinmeier, do të jenë gjithashtu të pranishëm.
