Kryeministri norvegjez Jonas Gahr Store u shpreh se përfshirja e miliarderit amerikan Elon Musk në punët e brendshme të vendeve të tjera është “shqetësuese”.
“Më duket shqetësues fakti që një njeri me qasje të madhe në mediat sociale dhe burime të mëdha ekonomike përfshihet kaq drejtpërdrejt në punët e brendshme të vendeve të tjera”, tha ai, cituar nga transmetuesi publik NRK.
“Kjo nuk është mënyra se si duhet të jenë gjërat mes demokracive dhe aleatëve. Nëse do të shihnim një skenar të tillë këtu në Norvegji, unë shpresoj dhe supozoj se skena politike norvegjeze do të distancohet prej tij”, shtoi ai.
Musk, i cili më parë deklaroi mbështetjen e tij për partinë e ekstremit të djathtë AFD të Gjermanisë, së fundmi përdori platformën e tij X për të kritikuar qeverinë laburiste të Britanisë dhe reagimin e qeverisë britanike ndaj një skandali historik të abuzimit të fëmijëve.
Javën e kaluar, ai akuzoi Ministren e Mbrojtjes Kundër Dhunës ndaj Grave të Britanisë Jess Phillips se ishte një “apologjiste e gjenocidit të përdhunimit”, i cili sipas tij duhej të ishte në burg. Musk gjithashtu bëri thirrje që kryeministri Keir Starmer të shkarkohej dhe të burgosej për dështime të supozuara në ndjekjen penale të bandave të abuzuesve.
Starmer dje e komentoi këtë çështje në mënyrë indirekte gjatë një konference për media, duke dënuar përhapjen e dezinformatave dhe “retorikës së ekstremit të djathtë”.
