Hamasi është gati të fillojë bisedimet mbi detajet e fazës së dytë të armëpushimit në Gaza, thanë të hënën për Agence France-Presse dy zyrtarë nga grupi militant palestinez.
“Hamasi ka informuar ndërmjetësuesit, gjatë komunikimeve të vazhdueshme dhe takimeve të zhvilluara me ndërmjetësit egjiptianë javën e kaluar në Kajro, se ne jemi gati të fillojmë negociatat për fazën e dytë”, tha një zyrtar në kushte anonimiteti. “Ne presim që ndërmjetësit të iniciojnë raundin tjetër të negociatave”, tha një tjetër.
Hamasi, që ka rikthyer shpejt kontrollin e tij mbi Gazën që prej arritjes së armëpushimit muajin e kaluar, ka thënë se nuk do të lirojë pengjet e planifikuar për t’u liruar në fazën e dytë pa përfundimin e luftës dhe tërheqjen e plotë të forcave izraelite.
Kërkesa e përsëritur e Trump që Egjipti dhe Jordania të marrin 1.5 milionë banorë të Gazës – një kërkesë e denoncuar me forcë si spastrim etnik nga të dy vendet dhe kombet e tjera arabe duke përfshirë Katarin, Arabinë Saudite dhe Emiratet e Bashkuara Arabe – kanë komplikuar tashmë negociatat për fazën e dytë të armëpushimit.
