Dy yjet e Guinness World Records dhe Got Talent Global e shumë skenave të tjera botërore, Artani dhe Arnoldi, “Balla Brothers,” sapo u regjistruan si votues nga jashtë.
Artan dhe Arnold Balla janë dy vëllezërit rekord shqiptarë që kanë pasion akrobacinë dhe u bëjnë thirrje të gjithë bashkatdhetarëve që të ndjekin shembullin e tyre dhe të votojnë më 11 maj, duke u regjistruar deri më datë 4 mars në www.kqz.gov.al.
“Atdheu na thërret për të dhënë votën dhe për të vazhduar punët e mira të Shqipërisë. Deri më datë 4 mars kanë mbetur edhe vetëm 30 ditë. Bëni zgjedhjen e duhur. Ju përshëndesin, Balla Brothers.”
Vëllezërit Balla kanë ngritur lart emrin e Shqipërisë me talentin e tyre në konkursin “America’s Got Talent,” ndërsa kanë bërë histori duke vendosur një rekord botëror për kohën më të gjatë të qëndrimit në ekuilibër me sy të mbyllur, në një cilindër. Për këtë ata janë certifikuar nga “Guinness World Records.”
Rekordi u vendos në Times Square në New York, ku Arnold dhe Artan Balla regjistruan rekordin prej 61.95 sekonda.
